RAIS MAGUFULI AKUBALI KUWAKABIDHI SIMBA SC KOMBE JUMAMOSI

RAIS wa Jamhuri ya Muungano wa Tanzania, Dk. John Pombe Joseph Magufuli amekubali kuwakabidhi Kombe la ubingwa wa Ligi Kuu ya Vodacom Tanzania Bara, Simba SC Jumamosi Uwanja wa Taifa mjini Dar es Salaam.

Hayo yamesemwa mchana wa leo na Mtendaji Mkuu wa Shirikisho la Soka Tanzania (TFF), Wilfred Kidau alipozungumza na Waandishi wa Habari leo makao makuu ya ofisi za shirikisho, Uwanja wa Karume, Ilala mjini Dar es Salaam.
Kidau amesema Rais Magufuli kabla ya kuwakabidhi Simba SC Kombe la ubingwa wa Ligi Kuu, ataanza kwa kukabidhiwa Kombe la ubingwa wa michuano ya Mataifa ya Afrika Mashariki na Kati kwa vijana chini ya umri wa miaka 17 (CECAFA U17), ambalo Tanzania ilitwaa mapema mwezi huu nchini Burundi. 

Rais Dk. John Pombe Joseph Magufuli amekubali kuwakabidhi Kombe Simba SC Jumamosi  

Simba SC wanatarajiwa kuwaalika Kagera Sugar katika mchezo wa Ligi Kuu ya Vodacom Tanzania Bara Jumamosi Uwanja wa Taifa, Dar es Salaam.
Mechi hiyo itakuwa maalum kwa Wekundu hao wa Msimbazi kukabidhiwa taji la ubingwa wa Ligi Kuu walilolitwaa Alhamisi wiki iliyopita baada ya mahasimu wao wa jadi, Yanga SC kufungwa 2-0 na Tanzania Prisons mjini Mbeya.
Simba SC wakajihakikishia wao ni mabingwa wa nchi baada ya ushindi wa 1-0 dhidi ya Singida United Jumamosi Uwanja wa Namfua mjini Singida.
Simba SC wamekwishajikusanyia pointi 68 hadi katika mechi 28, ambazo kati ya hizo wameshinda 20 na kutoa sare nane na baada ya mchezo wa Jumamosi watakwenda kukamilisha msimu kwa mchezo dhidi ya Maji Maji mjini Songea mkoani Ruvuma.