RATIBA LIGI YA VODACOM, KOMBE LA AZAM

Ligi Kuu ya Vodacom Tanzania Bara kwa sasa imesimama kwa takribani majuma mawili.

Sababu kubwa ya kusimama kwa ligi hiyo ni kupisha Kombe la Chalenji la CECAFA – michuano inayoratibiwa na Baraza la Soka kwa nchi za Afrika Mashariki (CECAFA).

Michuano ya CECAFA itafikia ukomo Desemba 17, mwaka huu na Shirikisho la Mpira wa Miguu Tanzania (TFF), limetoa ratiba mara baada ya michuano hiyo.

Desemba 22, 23, 24 na 26, zitakuwa siku za mechi za kuwania Kombe la Shirikisho la Azam yaani Azam Sports Federation Cup (ASFC).

Mechi zitakazochezwa katika siku hizo zitafahamika Desemba 5, mwaka huu ambako imepangwa droo ya timu 64 zitakazocheza Raundi ya Tatu ya ASFC.

Timu 64 maana yake ni kuwa timu 16 za Ligi Kuu ya Vodacom Tanzania Bara; timu 24 za Ligi Daraja la Kwanza na timu 24 ambazo zimefuzu kutoka hatua awali; ya kwanza na pili.

Baada ya michezo hiyo, ratiba ya Ligi Kuu ya Vodacom itaendelea tena kwa michezo ya raundi ya 12 itakayofanyika Desemba 29, 30 na 31 kabla ya ligi tena kusimama kupisha michuano ya Kombe la Mapinduzi.

WATANZANIA HAWA KAZINI CECAFA

Baraza la Mpira wa Miguu la nchi za Afrika Mashariki, limeteua Watanzania wanne (4), kuendesha michuano ya kuwania Kombe la Chalenji inayoandaliwa na CECAFA.

Watanzania hao ni Alhaji Ahmed Mgoyi aliyeteuliwa katika Idara ya Mashindano huko CECAFA wakati mwingine ni Sunday Kayuni ambaye ameteuliwa katika Idara ya Ufundi.

Mgoyi ameteuliwa kutokana na uzoefu na uwezo wa  wake wa kusimamia mashindano ya kimataifa huku akiwa na rekodi ya kusimamia vema mashindano hayo yalipofanyika kwa mara ya mwisho nchini Tanzania mwaka 2015 wakati Kayuni ni Mkufunzi anayetambuliwa Shirikisho la Mpira wa Miguu Afrika (CAF).

Wengine ambao wameteuliwa kuendesha michuano hiyo ni Waamuzi wawili. 

Waamuzi  hao ni Elly Sasii (mwamuzi wa kati) na Soud Lilla (Mwamuzi Msaidizi). Tayari wateuliwa wote wako Kenya kwa ajili ya michuano hiyo.